PRJÓNAPERLUR - prjónað frá grasrótinni

Oh well....

2011-11-22T12:09:00.001Z

We have had problems with both our website and blog since "Midjan.is" where we kept our stuff online has quit. So now we are back to blogspot, were it all started long time ago.... :-)
But the blog wont be as active as it was, Erla has moved to Australia (!) for one year and Halldóra is still in Sweden. Our books are still available (corr: Prjónaperlur 1 is now sold out!) and can be found in bookstores in Iceland. It is Gudrun, Erlas mom who now manages all the daily book-business.
Our English book "Iceland Knits" can be ordered online here: icelandknits@gmail.com (29 usd). Take a look at our Flickr site to see photos of the patterns in the book.

Einfalt er oft best

2011-08-10T21:19:00.002+01:00

Já, prjónið þarf ekki aldeilis að vera súperdúperflókið.... til að vera skemmtilegt og flott. Þær hjá Purl Soho hafa prjónað þessi einföldu en skemmtilegu barnateppi, sem eru bara garðaprjón - í öllum mögulegum litum. Samstæðum - eða ekki... Ótrúlega flott. Soldið hippó - en aðallega hlýleg - og girnileg. Hægt að nota hvaða garn sem er - líklegast flottast í frekar grófu garni (og helst ekki sem stingur litlu geyin).

Þeir sem kunna að fitja upp, prjóna, og fella af fara leikandi með svona verkefni.

Jamm og já

2011-08-01T21:31:00.002+01:00

Já, við Prjónaperlurnar erum fluttar aftur hingað á Blogspot-bloggið okkar. Og munum halda áfram að færa ykkur ný og gömul prjónatíðindi eftir því sem prjóna-andinn blæs okkur í brjóst.

Annars erum við báðar búnar að vera soldið latar í prjóninu í sumar, og þó.... það hefur eitt og annað runnið af prjónunum hjá okkur. Meira um það og myndir af þeim meistaraverkum seinna :-).

Yours truly,
Yfir-prjónaperlurnar Halldóra og Erla.

Perlurnar komnar aftur á blogspot !

2011-06-01T13:33:00.001+01:00

Jææææja....
Við Perlurnar erum búnar að vera rúmt ár með bloggið okkar á Miðjunni, en nú er eitthvað bögg í gangi og bloggið búið að liggja niðri í mánuð. Þannig að, við smellum okkur bara hingað aftur á gamla blogspotið.... :-)

Perlurnar flytja sig um set....

2010-03-10T09:12:00.002Z

Við perlurnar erum búnar að flytja okkur yfir á Miðjuna, komið og kíkið á okkur í nýjum og björtum híbýlum:

http://prjonaperlur.midjan.is/

Ykkar ætíð prjónandi,

Halldóra og Erla

Stieg Larsson, Arnaldur Indriðason, Lisa Marklund.... og við Perlurnar !

2010-03-05T22:44:00.008Z

Jæja, bara að láta ykkur vita að við hérna félagarnir Stieg, Arnaldur og Lisa erum enn og aftur vinsælust á Íslandi.... :-)

Prjónaperlurnar eru í 10. sæti á metsölulista Félags íslenskra bókaútgefenda á tímabilinu jan-feb.
Vúhúúú!

Uppsafnaður metsölulisti tímabilið 01.01.10 - 28.02.10

1. Loftkastalinn sem hrundi - Stieg Larsson
2. Svörtuloft - Arnaldur Indriðason
3. Stúlkan sem lék sér að eldinum - Stieg Larsson
4. Póstkortamorðin - Liza Marklund/James Patterson
5. Almanak Háskóla Íslands 2010 - Háskóli Íslands
6. Matur og drykkur - Helga Sigurðardóttir
7. Þegar kóngur kom - Helgi Ingólfsson
8. Skemmtilegu Smábarnabækurnar - Ýmsir
9. Bankster - Guðmundur J. Óskarsson
10. Prjónaperlur - Halldóra Skarphéðinsdóttir og Erla S. Sigurðardóttir.

Perlurnar rokka feitt.... :-)

.

Unaður

2010-03-04T14:08:00.008Z

Jæja nú erum við Erla báðar búnar að kaupa okkur Japönsku bókina 1000 knitting patterns. Á netinu, hjá Needleart bookshop. Svíndýr, og með svínslegum tollgjöldum (til Íslands) - en ó svo yndisleg.....! Í alvöru talað - ÞÚSUND prjónamunstur....!! af öllum gerðum og sortum. Trilljón mismunandi kaðlar, grilljón mismunandi útprjón eða gataprjón, og bara Zilljón alls konar munstur....
Unaður.

Okkur klæjar í puttana að byrja á alls konar verkefnum, Erla er byrjuð á sjali með e.k. "Daisy stitch", og ég er byrjuð á trefli með útprjóni... :-)

Sjáiði t.d. þessa flottu og vorlegu trefla (myndin er frá Interweave store), það er "bara" að velja girnilegt garn og fallegt gatamunstur - eitt eða blanda saman fleirum - og hanna þinn eigin trefil.
Ef þú átt ekki svona (svíndýra og sjúklega flotta) munsturbók má jú líka finna fín munstur í svona trefla t.d. á Ravelry. Velja "pattern", skrifa "lace pattern" sem leitarorð, klikka svo í "free" undir availability til að bara fá fram þær uppskriftir sem eru ókeypis.

.

Heklaðir pottaleppar

2010-02-27T15:20:00.004Z

Það vildi svo skemmtilega til að það var svona second hand markaður í kjallaranum á garnbúðinni Trassel í Täby, norður af Stokkhólmi sem ég átti leið í (aldrei þessu vant - eða þannig...). Þar fann ég þessa hrikalega krúttlegu hekluðu pottaleppa á 10 kr. (sænskar) stykkið, og gat ekki á mér setið og keypti nokkra! Tvo sendi ég til Erlu, og þrír þeirra prýða nú í eldhúsvegginn hjá mér og ylja mér um hjartaræturnar - einsog krúttlegu hekli einu er lagið. (Ætli Frey (Manninum) finnist þeir eins smart og mér....? he he....).

Nú klæjar mig eiginlega í fingurna að hekla svona sæta pottaleppa, skemmtileg tilviljun að það er einmitt nokkrar uppskriftir af pottaleppum í nýjasta Drops blaðinu, númer 120, t.d. þessir. Ég myndi reyndar hafa mína tvöfalda - hekla eitthvað á bakhliðina.....

:-)

Íslenska Ólympíuleikahúfan

2010-02-25T20:55:00.001Z

Jæja, þá er Svíaríki orðið heltekið af hekl-æði. Húfu hekl-æði. Ólympíuhúfu hekl-æði.

Eftir því sem sænsku Ólympíufararnir vinna fleiri verðlaun á Ólympíuleikunum í Vancouver magnast æðið og nú er svo komið að blátt og gult garn (af rétta merkinu: Eskimo frá Drops) fæst hvergi, og heklunál númer 8 er uppseld í landinu - "Slutsåld i hela riket!". Blöðin segja frá sveittum garnbúðareigendum sem hafa ekki við að svara í símann: "Nei, því miður, blátt og gult garn kemur ekki aftur fyrr en í viku 10...., og nei, við eigum enga heklunál númer 8 til því miður".

Sérstakur fatnaður eða Collection var hannað á sænsku Ólympíufarana, alls 60 misunandi flíkur, en engin þeirra hefur fengið eins mikla athygli og heklaða húfan í sænsku fánalitunum, eða "OS mössan". Vissar flíkur eiga að notast á verðlaunapalli, þar á meðal er heklaða Ólympíuhúfan, þannig að hún hefur birst á ansi mörgum myndum í blöðum og sjónvarpi undanfarið hér í Svíþjóð.

Við hérna Íslendingarnir á Kantarellvägen í Vallentuna gátum ekki horft uppá þetta aðgerðalaus og grófum því fram plötulopann í réttu litunum (þrefaldan og heklunál nr.10). Gátum ekki látið hverfið verða algjörlega blá-gult á hausnum án þess að hreyfa legg né lið.

Nú vill svo til að blessaður plötulopinn er svolítið spes, þannig að mér finnst hann ekki koma alveg nógu vel út í þessari húfu - hún getur t.d. ekki "lekið" rétt niður ofan á kollinum, og maður virðist vera soldið svona einsog biðukolla á hausnum með hana frekar en frækinn Ólympíuverðlaunahafi - sýnist mér eftir að hafa mátað hana, þannig að þetta heklerí hefur verið sett á hold.... :-) Erlu fannst merkilegast að ég skyldi eiga plötulopa í réttu litunum bara si svona inní skáp hér úti í Sverige - en ég er jú með garnlager heima hjá mér (manninum til þó nokkurs ama) sem hver meðal garnbúð væri stolt af.... :-)

Uppskriftin er mjög einföld. Garnið Eskimo frá Drops er notað í húfuna (en einnig má nota fíngerðara garn tvöfalt), og heklunál nr. 8. Fyrst er bara hekluð flöt plata ofaná höfðinu þar til næg vídd næst (20 cm), þá er heklað í hverja lykkju án útaukninga þar til húfan er orðin nokkuð síð (á að hanga soldið á hnakkanum). Hér að neðan er uppskriftin á sænsku einsog hún hefur birst í mörgum dagblöðum og á mörgum bloggum. Þýðing á heklhugtökunum er að finna hjá Garnstudio. Í þessari uppskrift er heklað með fastalykkjum, en þeir sem til þekkja segja að fyrirmyndin sé hekluð með hálfstuðlum. Það er auðvelt að breyta því; bara hekla með hálfstuðlum, eftir uppskriftinni, þar til stykkið mælist 20 cm (ca. 40 lykkjur alls), hekla þá án útaukninga þar til rétt sídd fæst.

Góða skemmtun með hekleríð,
Yours truly i Sverige - Halldóra.

.

Baby Surprise Jacket

2010-02-22T13:22:00.000Z

Krummi dálítið hissa í Baby Surprise Jacket - mjög viðeigandi ;)

Jæja jæja lesendur góðir!

Þá er komið að því að státa sig af prjónadásemdinni sem ég kláraði í síðustu viku, svokölluðum Baby Surprise Jacket, en það er meistarastykki nokkuð hannað af prjónagúrúinu Elizabeth Zimmermann (f. 1910-d. 1999). Elizabeth hannaði þessa peysu árið 1968 og ekki annað hægt að segja en að hún sé algjört prjónahönnunarundur. Maður prjónar peysuna fram og til baka (garðaprjón) og ef maður tekur úr og eykur í á réttum stöðum verður allt í einu til þessi líka svaka fína garðaprjónspeysa! Peysan er saumuð saman á öxlunum.

Ég notaði fína heimalitaða Kambgarnið mitt í þessa peysu (upplýsingar um garnlitun er hér aðeins neðar á blogginu). Ég prjónaði hana á prjóna nr. 3,5 og það fóru rétt tæpar 2 dokkur af Kambgarni í hana. Hún passar á litla snúðinn minn sem nú er rétt rúmlega 2 mánaða. Hún mun svo vaxa með honum upp í ca. 6 mánaða myndi ég halda en garðaprjónið teygist vel og peysan er rúm. Ég á svo pottþétt eftir að gera aðra stærri peysu þegar hann hættir að passa í þessa, þá á þykkara garn og stærri prjóna. Ermarnar á þessari peysu er nokkuð stuttar, en einfalt er að taka upp lykkjur og prjóna framan á þær.

Uppskriftina að BSJ má kaupa í Nálinni á Laugavegi og eins er hana að finna í bókum Zimmermann: The Opinionated Knitter og Knitting Workshop.

BSJ er prjónuð í einu stykki fram og til baka

Gestaþraut: Hvernig setur maður þetta saman til að úr verði peysa?? Ég þurfti að fletta upp vídjói á Youtube til að finna út úr því haha!

Peysan tilbúin, nema vantar tölurnar á...

Krummi sæti í sætu peysunni

Prjónakennsla

2010-02-16T00:48:00.000Z

Því miður var ekki pláss fyrir prjónakennslu í Prjónaperlu-bókinni (við tímdum ekki plássinu undir það!), en á netinu er fjöldi góðra kennslumyndbanda. Til dæmis er Drops eða Garnstudio.com með mörg góð myndbönd, sem sýna bæði undirstöðuatriði og flóknara prjón.

Hér fyrir neðan er linkur á nokkur myndbönd þeirra í undirstöðuatriðunum. Smelltu á play til að skoða myndböndin, og svo "share" efst í horni myndbandsins, og síðan "visit URL" til að komast á síðuna þeirra til að skoða fleiri myndbönd.

Fitja upp.

Cast on from DROPS Design on Vimeo.

Garðaprjón (slétt prjón).
(prjónað fram og til baka, slétt báðu megin)

Garter stitch from DROPS Design on Vimeo.

Prjónað brugðið.

Purl 3 from DROPS Design on Vimeo.

Fella af

Bind off right side from DROPS Design on Vimeo.

Hér er pottþétt aðferð til að fella laust af, sem Halla lopi kenndi okkur í saumó Norður Stokkhólms :-) :

Prjónaráð

2010-02-15T23:01:00.000Z

Á garnstudio.com eru mörg prjónamyndbönd. Hér koma nokkur sem sýna góð prjónaráð.

Er dokkan búin? Þá er bara að spýta í lófana og "þæfa" nýjan enda við þann gamla. Engir þráðar að ganga frá.... :-) (virkar með flest ullarband):

Add a new ball of yarn from DROPS Design on Vimeo.

Hér er sýnt hvernig prjónamerki eru notuð. Í þessu dæmi er aukið út um 1 lykkju sitt hvoru megin við prjónamerkin.

Stitch markers from DROPS Design on Vimeo.

Hér kemur lausn á algengu vandamáli:
Misstirðu niður lykkju? Náðu í heklunál og "heklaðu" hana upp!:

Dropped stitch from DROPS Design on Vimeo.

Russian join - góð aðferð til að skeyta saman 2 þráðum. Gott er að nota ef erfitt er að ganga frá endunum, einsog t.d. í prjóni með fíngert garn einsog einband. Þessa aðferð er t.d. upplagt að nota í Möbíusnum þegar maður skiptir um lit.

Russian join from DROPS Design on Vimeo.

Perlurnar í 8. sæti í janúar!

2010-02-06T13:14:00.000Z

Við segjum ykkur stoltar frá því að Prjónaperlur eru í 8. sæti á metsölulista Félags íslenskra bókaútgefenda (FÍBÚT) í janúarmánuði! Jibbí jei, gaman gaman! Við vissum jú alltaf að þetta væri skemmtileg prjónabók en að komast á metsölulista er þvílíkur heiður. Takk kærlega allir prjónarar þarna úti. Við vonum að þið séuð að njóta bókarinnar og hafið gaman af því að prjóna upp úr henni. Stykkin í bókinni eru alls konar, flókin og einföld, og ættu allir að finna sér eitthvað við hæfi. Grasrótin er svo sannarlega að gera góða hluti í prjóni - það er engin spurning :)

Kíkið endilega á Prjónaperluklúbbin á Facebook og skoðið þær myndir sem hafa verið settar inn af þeim stykkjum sem fólk hefur prjónað upp úr bókinni. Við viljum endilega fá að sjá þetta er allt svo flott! Sumir prjóna beint upp úr bókinni en aðrir hafa gaman af því að breyta og fabúlera með uppskriftirnar. Útkoman verður alltaf skemmtileg!

Hér má sjá nokkrar myndir frá gerð bókarinnar. Allt ferli í þeirri vinnu var svo skemmtilegt. Hér má sjá Elísabetu Stefánsdóttur vinkonu okkar og áhugaljósmyndara með meiru munda vélina með stæl. Útkoman var æðisleg!

Takk aftur!
Prjónaást,
Erla og Halldóra

Meiri (græn) garnlitun!

2010-01-28T08:37:00.001Z

Dylon litirnir úr Þorsteini Bergmann

Jæja, þá ætla ég að segja ykkur frá ævintýralegu garnlituninni sem ég lagði í í gærkvöldi. Ég litaði kambgarn og einband með litum sem heita DYLON og ég keypti í verslun Þorsteins Bergmann á Skólavörðustígnum. Litirnir eru ódýrir, hvert box 250 kall minnir mig og samkvæmt leiðbeiningunum dugar það til að lita 250 grömm af efni/garni. Ég gat ekki staðist þetta og keypti 6 liti. Notaði einn í gærkvöldi: Ólívugrænan.

Maður setur einfaldlega vatn í pott, ég setti hér 2 lítra, leysir litaduftið upp í öðrum hálfum lítra og hellir út í. Magnið af vatninu fer jú aðeins eftir því hversu mikið garn á að lita. Ég vildi lita tvær dokkur af kambgarni: 100 grömm, og notaði því aðeins helminginn af litnum/duftinu í dollunni. Ég hitaði vatnið upp að suðu á hellunni. Maður á að setja eina matskeið af salti út í.... EN ég gleymdi því!

Ég hafði undið kambgarnið upp í svona lengjur og dýfði hluta af því ofan í pottinn (slökkti undir þegar suðan kom upp). Ég vildi hafa garnið mismikið litað og því fóru hlutar af garninu ofan í pottinn með um 15 mínútna millibili. Því lengur sem garnið er í litnum því sterkari og meiri litur fæst. Samtals litaði ég garnið í um 30 - 40 mínútur. Eftir það fannst mér nægur litur eftir í pottinum svo ég dýfði hreinlega hluta af heilli dokku af einbandi ofan í pottinn, nennti ekki að vinda hana upp, ákvað að athuga hvort þetta gengi svona líka. Og viti menn, þetta tókst líka, einbandið litaðist nokkuð vel og inni í dokkunni líka. Gott mál.

Í litaprósessnum hafði ég furðað mig á því hvað þessi "ólívugræni" litur væri ekki svo mikið ólívugrænn heldur meira venjulega grænn eða jafnvel blágrænn. Mjög fínn litur og allt það en ekki alveg eins og stóð á litadollunni... Svo þegar ég uppgötvaði (mjög seint, alveg í lokin) að ég hafði gleymt að setja saltið út í pottinn þá ákvað ég að setja saltið út í og athuga hvað myndi gerast. Og viti menn, liturinn varð ólívugrænn :) Jamm, liturinn sem sagt breyttist úr þessum dökkgræna í ólívugrænan svo saltið hefur greinilega áhrif á að liturinn komi rétt út. Hins vegar fannst mér liturinn án salts festast mjög vel í garninu svo það er ekki eins og saltið eða skortur á salti hafi haft mikil áhrif á festu.

Hér að neðan má sjá afraksturinn.
Þegar liturinn var orðinn ólívugrænn lék ég mér aðeins að því að dýfa hluta af einbandinu og kambgarninu ofan í það til að fá smá þannig keim líka á garnið.
Útkoman er ævintýralega GRÆN og skemmtileg :)

Næst er það svo kaffibrúnn, bordaux, jungle green, appelsínugulur og og og... :)
Og auðvitað prjóna Baby Surprise Jacket hennar Elizabeth Zimmermann úr græna kambgarninu á litla snúðinn minn, sjá mynd af peysunni hér á Ravelry (eru ekki annars örugglega allir búnir að skrá sig þar!?)

Grænar kveðjur,
Erla

p.s. mæli með að þið notið hanska við litunina, ég er með aðeins of græna fingur í dag!

kambgarnið í pottinum með litnum

búið að lita kambgarnið. Fyrst skildi ég eftir nokkra hvíta búta en dýfði þeim svo aftur ofan í síðar þegar liturinn var orðinn meira ólívugrænn. Vildi hafa þá ljósljósgræna í stað hvíta

einbandsdokkunum skellt út í í heilu lagi!

kambgarnið litað og tilbúið - og allt öðruvísi en ég bjóst við! Það er líka það skemmtilega við litunina

jömmí!

Hér má sjá einbandið - dokkan hér til hægri er lituð í litnum án salts (gleymdi því fyrst) en sú síðari í sama lit með salti. Hitaði bara litinn upp aftur og hafði dokkuna ofan í á meðan

og hér má sjá fyrri einbandsdokkuna sem var litun án salts, dökkgræn, en svo dýfði ég öðrum endanum ofan í ólívugræna litinn og þá varð þetta svona ævintýralega skemmtilegur alls konar grænn litur :)

eins og sjá má fer grænt þessum sæta snúði svo vel - hann mun fá BSJ á næstunni úr kambgarninu :)

Perlurnar á metsölulsta!

2010-01-25T21:32:00.000Z

Vá...Prjónaperlurnar eru á top tíu lista yfir mest seldur bækurnar það sem af er janúar :) Ekkert smá gaman og við erum svo stoltar af okkur og perlunum okkar! Og sérstaklega ánægðar með ykkur sem eruð að prjóna upp úr bókinni. Þetta ævintýri hefur gengið svakalega vel og það gleður okkar prjónahjörtu að sjá bókina á svona fínum sölulista :)

Metsölulistinn byggist á upplýsingum frá eftirtöldum verslunum: Bókabúð Máls og menningar, Eskju, Hamraborg, Iðu, Bókabúðin við höfnina (Stykkishólmi), Bóksölu stúdenta, Bónus, Hagkaupum, Kaupási, N1, Office 1, Pennanum - Eymundsson og Samkaupum. Rannsóknarsetur
verslunarinnar tekur listann saman.

Elskum ykkur,
E+H

17 km langur trefill fyrir norðan!

2010-01-22T10:49:00.000Z

Fríða Gylfadóttir frá Siglufirði vakti athygli okkar á mjög skemmtilegu prjónaverkefni sem er í gangi fyrir norðan. En það er að prjóna trefil sem mun ná í gegnum Héðinsfjarðargöngin sem munu tengja Siglufjörð og Ólafsfjörð saman - alls 17 km langur trefill !!!

Á heimasíðu Fjallabyggðar má lesa þetta um verkefnið:
"Í Fjallabyggð keppist fólk nú við að prjóna. Karlar, konur og börn, innfæddir, aðfluttir og fráfluttir, á öllum aldri hafa tekið upp prjónana og keppast nú við að prjóna 17 km. langan trefil. Ætlunin er að nýta trefillinn til að tengja saman byggðarkjarnana alveg frá miðbæ Siglufjarðar í gegnum Héðinsfjarðargöng inn í miðbæ Ólafsfjarðar við vígslu gangana í lok september nk. þegar göngin verða formlega opnuð.

Hugmyndina að þessu framtaki á Fríða Gylfadóttir listamaður á Siglufirði og hefur hún staðið í ströngu síðustu daga við að koma verkefninu af stað.
Eftir að byggðakjarnarnir hafa verið tengdir saman er ætlunin að búta trefillinn niður í minni trefla, þæfa þá, sauma í þá merki Fjallabyggðar og selja til styrktar góðgerðarmálum.

Búið er að setja upp prjóna á helstu samkomustöðum sveitarfélagsins sem hægt verði að grípa í þegar tækifæri gefst. Það má því búast við að prjónað verði á biðstofum heilsugæslunnar, á hárgreiðslustofunum, öllum verslunum, í bakaríinu, í apótekinu, í frímínútum hjá grunnskólunum, á bifreiðaverkstæðum, og kaffistofum út allt sveitarfélagið.

Fríða hvetur allt prjónafólk á Siglufirði, Ólafsfirði og um land allt til að sameinast og senda inn búta. Litir, gerð garns eða prjónamunstur skiptir ekki máli, bútarnir þurfa bara að vera 20 cm. breiðir. Vinnustofa Fríðu á Siglufirði verður opin alla mánudaga frá kl. 15-18 í tengslum við verkefnið svo einnig verður hægt að mæta þangað.

Áhugasamir geta haft samband við listamanninn í síma 896-8686, eða sent línu á frida@frida.is. Auk þess er hægt að senda búta á skrifstofu sveitarfélagsins Gránugötu 24 580 Siglufirði eða Ólafsveg 4 625 Ólafsfirði."

Fylgist með framvindu mála hér: www.frida.is !

Kortið hér að neðan er frá heimasíðu vegagerðarinnar og sýnir Héðinsfjarðargöng, og myndin er af Siglufirði (frá vef Jónasar Gunnlaugssonar).

Þæfðir vettlingar

2010-01-17T18:21:00.000Z

Vettlingarnir eru prjónaðir RISAstórir svo þeir passi eftir þæfingu

Þykkir, hlýir, flottir... ;)

Svona þæfðir vettlingar eru eiginlega algjört "must have" í íslenskum (og sænskum!) vetri. Þeir eru svo þéttir og hlýir, það fer ekkert í gegnum þá!

Bóndinn sá einhverja svakalega fína vettlinga í útivistarbúð hér í bæ sem hann langaði í. Þetta voru þæfðir ullarvettlingar, eitthvað erlent merki - og vissulega rándýrir. Svo hann lagði inn pöntun hjá prjónaranum sínum (Erlu!).

Ég hafði einu sinni áður prófað að þæfa lopavettlinga en sú tilraun mistókst allhrapalega! Vettlingarnir, sem áttu að vera afmælisgjöf til vinkonu minnar, svo að segja hurfu í þvottavélinni! Þeir pössuðu ekki einu sinni á 5 ára dóttur mína! Þeir urðu pínulitlir og harðir eins og steinn... Ég vissi ekki hvort ég ætti að hlæja eða gráta þegar ég opnaði þvottavélina! En alla vega, ég vissi að einn daginn yrði ég að leggja aftur í vettlingaþæfingu, það myndi ekki þýða að flýja það forever... ;) Ég vissi sem var, að ég hafði sett umrædda vettlinga á of langt þvottaprógramm sem gerði það að verkum að þeir þæfðust alltof mikið. Þá er það víst staðreynd (frétti það eftir á) að hærusvartur litur þæfist víst mest af öllum, og vettlingarnir voru jú hærusvartir að lit.

Ég notaði uppskriftina hennar Halldóru af "Venjulegum vettlingum" úr Prjónaperlum nema stækkaði prjónana upp í nr. 6 og 7. Stroffið er prjónað á 6 og vettlingurinn sjálfur er prjónaður á 7. Ég notaði þrefaldan plötulopa því Viggi vildi fá vettlingana þykka. Svo fór ég í lopaafgangana mína og setti saman þetta fína kombó af ljósbláum, dökkbrúnum, rauðbrúnum og hvítum. Ég prjónaði fyrst einn vettling og setti í þvottavélina til að sjá hvernig þæfingin myndi heppnast. Ég stillti vélina á 30° og setti á stutt bómullarprógramm. Skellti einu litlu handklæði með í vélina. Spennan var í hámarki ... Vettlingurinn þæfðist vel í fyrstu umferð svo ég lagði í að prjóna hinn vettlinginn. Ég gerði þumalinn á þeim vettlingi úr öðrum lit og ruglaði röðinni á litunum í oddamunstrinu bara í gamni. Skellti honum svo í þvottavélina á sama prógramm. Vettlingurinn þæfðist vel nema þumallinn ekki! Mjög spes! Þumallinn var enn risastór! Hann var rauðbrúnn að lit og þá sá ég að sá litur í lopanum var ekki að þæfast eins vel og hinir. Litirnir þæfast sem sagt aðeins mismunandi... og sá rauðbrúni voðalega lítið. Ég tók því áhættuna og smellti vettlingunum báðum aftur í vélina, þeir máttu líka alveg við því, þeir voru enn svona í það stærsta. Pössuðu á Vigga en mættu alveg vera aðeins minni, svo við tókum sameiginlega ákvörðun um að taka þá svakalegu áhættu að skella vettlingunum aðra ferð í þvottavélina.

Þegar vettlingarnir komu úr þvottavélarferð nr. 2 voru þeir aðeins litlir en við teygðum þá bara vel til og þá smellpössuðu þeir á kallinn. Rauðbrúni þumallinn var hins vegar enn dálítið stór - en allt í lagi samt. Það er sem sagt hægt að teygja lopann mjög vel og móta hann eftir þæfingu, á meðan vettlingarnir eru enn blautir.

Niðurstaða:
Æðislegir skotheldir vetrarvettlingar. Og hver segir að vettlingar þurfi endilega að vera eins að lit báðir tveir?? ;)

Samantekt:
Uppskrift: Venjulegir vettlingar úr Prjónaperlum
Prjónar: Nr. 6 í stroffið, nr. 7 í vettlinginn sjálfan
Stærð: XL eftir eina ferð í þvottavélina en L eftir tvær þvottavélaferðir
Þvottur: 30° á stutt bómullarprógramm. Setja lítið handklæði með. Ef þeir eru enn of stórir eða þæfast illa eftir fyrsta þvott þá er um að gera að skella þeim bara aðra ferð. Takið strax úr vélinni eftir þvott til að hægt sé að móta þá og teygja ef þarf
Litir: Dökkbrúnn og ljósblár þæfast vel en rauðbrúnn illa

Að lita garn

2010-01-13T21:06:00.000Z

Karrý og Smartgarn

Hæ hó kæru prjónavinir!
Nýfæddur sonur minn fékk svo fallega lambhúshettu í jólagjöf frá bróður mínum og mágkonu. Hún var prjónuð í prjónavél móður mágkonunnar og það úr handlituðu garni. Garnið var litað með alls kyns berjum og var svo girnilegt og fallegt. Mágkonan, sem er byrjandi í prjóni, sagði ferlið einfalt svo ég mátti til með að prófa!

Ég fékk mömmu í lið með mér og saman prófuðum við í dag ýmsar kúnstir í garnlitun. Við ákváðum að prófa aðeins náttúruleg hráefni til að byrja með, þ.e. enga sérstaka keypta liti. Hráefnin sem okkur datt í hug að nota til að fá lit voru karrý, te, rauðbeðusafi, spínat og bláber. Garnið sem við prófuðum að lita var: Einband, Smart, bómullarheklugarn (sláturgarn) og kambgarn. Hér er litunarferlinu lýst ásamt því sem þið fáið að sjá árangurinn... sem kom svolítið á óvart!

Efni og tæki: Te, bláber, karrý, rauðbeðusafi (spínatið varð svo ógirnilegt í pottinum að við hættum við það!), borðedik, salt, hanskar, pottur, sleif, sigti, vatn, eldavél...og hvítt GARN ;)

Ferlið:
1. Vindið garnið upp í lengjur.
2. Setjið hráefnið sem á að nota til litunar í pott ásamt vatni. Byrjið á því að nota minna vatn en meira og bætið frekar vatni út í finnist ykkur liturinn vera of sterkur. Styrkur litarins fer jú mikið eftir magni vatnins.
3. Setjið ca. 1 msk. af salti út í pottinn og dasssss af ediki.
4. Hitið upp að suðu. Látið sjóða/malla þar til ykkur finnst liturinn á vatninu í pottinum orðið ykkur að skapi! Sigtið þá hráefnið í pottinum úr vatninu (berin frá vatninu, tepokana frá vatninu) og notið aðeins vökvann til litunar.
5. Setjið garnið ofan í pottinn. Við slökktum ekki undir pottinum heldur lækkuðum bara hitann. Setjið aðeins hluta af garninu ofan í strax í upphafi ef þið viljið fá mislitt garn, þ.e. ekki allt eins á litinn heldur part af garninu dökkt og annan part ljósari. Því lengur sem garnið er ofan í, því dekkri litur kemur á það.
6. Tíminn sem það tekur að lita garnið er afar misjafn eftir litarefni. Karrýið litar mjög fljótt fannst okkur en bláberin og teið var mun lengur. Þetta getur þurft að vera í pottinum í 15 mínútur og upp í þess vegna klukkutíma... Fer eftir litarefni og garntegund (og þolinmæði haha!)
7. Skolið garnið upp úr köldu vatni og leggið til þerris.

Niðurstaðan okkar í þetta fyrsta sinn sem við litum garn á þennan hátt er eftirfarandi:

a. Það er fyrst og fremst ótrúlega skemmtilegt að lita sitt eigið garn - svo persónulegt og spennandi hver útkoman verður... :)
b. Bláber: Einbandið litaðist mjög illa af bláberjunum, og þó var það heillengi ofan í pottinum. Liturinn skolaðist nánast allur úr og einbandið endaði á því að vera föl-fjólubleikt. Hins vegar tókum við eftir því að spottarnir sem við bundum utan um einbandið (til að halda því saman til að það flæktist ekki) lituðust svakalega vel og fengu rosa flottan djúpfjólubláan lit, mjög girnó! Þessir spottar voru úr einhverju þýsku ullargarni sem við gripum til að binda... = Einbandið litaðist ekki en þýska baby ullararnið litaðist mjög flott. Spurning hvað Kambgarnið eða léttlopinn gerir... prófum það næst (var ekki til nægur litur í þetta sinn til að prófa það). Ég veit líka að Lanette litast mjög fallega og vel af berjum (lambhúshetta sonarins er úr Lanette). Heklugarnið mitt (bómullarband) varð pastelfjólublátt... sem reyndar hentar mjög vel til Frjálsmenagerðar svo það er bara gott mál :)
c. Karrý: Svínvirkar á einbandið! Og ábyggilega allt annað garn... liturinn er svo sterkur.
d. Te: Við notuðum bæði piparmyntute og svart te saman, niðurstaðan varð svona gulllitað/ljósbronsað Kambgarn, í raun mjög flott, en ekki sterkur litur. Hefði verið til í að fá eilítið sterkari brúnan. En mjög flott samt :) Heklugarnið varð ljós beige...
e. Rauðbeðusafi: Smartgarnið varð skemmtilega bleikt og rauðbleikt, heklugarnið (bómullar) varð ljósbleikt.

Hér má sjá myndir úr lituninni - reynið svo endilega sjálf og látið ímyndunaraflið ráða för með matvörur og liti ;) Þá er auðvitað líka hægt að kaupa sérstaka liti til að lita svona garn, t.d. hjá Þorsteini Bergmann á Skólavörðustígnum í miðbæ Reykjavíkur. Við ætlum að prófa þá liti mjög fljótlega líka og rapportera!

Góða skemmtun...
Erla

Hráefnið

Móðir og barn ;) - undirbúa garnið fyrir litun

Kambgarn, einband og Smart

Búið að sjóða bláberin (í vatni og með ediki og salti) og fá fínan fjólubláan lit á vatnið

Einbandið mallar í litnum - fyrst er hluti settur ofan í, hann látinn malla í dágóða stund eða þar til garnið er orðið nokkðu vel litað, þá er næsti hluti settur ofan í o.s.frv.

Jömmí!! - já virkar girnó hér... en liturinn á einbandinu varð svo voðalega daufur. Virkar betur á aðrar týpur af ullargarni

Hér er einbandið litað með bláberjum, takið eftir því hvað spottarnir sem halda garninu saman eru fallega fjólubláir á meðan einbandið litaðist frekar dauflega. Samt alveg flott!

Mamma við pottana

Kambgarnið í teinu

Hér er heklugarnið - frá vinstri til hægri er það te, bláber og rauðbeðusafi

Gulllitað kamb

Smartgarn - karrý og rauðbeðusafi
Eins og sést á myndunum er ekki ýkja mikill litarmunur á garninu hjá okkur, en við létum kannski ekki líða nægilega langan tíma á milli þess sem við dýfðum garnhlutunum ofan í litinn. Það er þó eilítið meiri munur en myndirnar sýna.

Sjónvarpssokkarnir fínu...

2010-01-06T00:33:00.000Z

Hér fer reynslusaga sjónvarpssokkaprjónarans mín:

Ég prjónaði nokkra sjónvarpssokka fyrir Prjónaperlur, pikkaði uppskriftina bara upp eftir einum af þeim gömlu góðu sjónvarpssokkum sem amma Silla prjónaði á mig forðum daga. Nú í kuldakastinu undanfarið hef ég varla farið úr einu parinu... þeir eru svo mjúkir og hlýir... - nema hvað, að eftir nokkra notkun á þeim voru þeir farnir að verða of víðir og óþægilega stórir. Mér fannst allt í einu eins og þeir væru of lausir í sér, prjónaðir á of stóra prjóna jafnvel. Svo í stað þess að gefa þá upp á bátinn ákvað ég að skella þeim hreinlega bara í þvottavélina og prófa að þæfa þá eilítið. Ég setti þá á venjulegt bómullarprógramm á 30°, ÁN forþvottar. Ég kveið nokkuð niðurstöðunni þar sem ég hafði stuttu áður þæft vettlinga sem áttu að passa á fullorðinn en komu úr þvottavélinni aaaalltof litlir, pössuðu ekki einu sinni á 5 ára dóttur mína..! En þá hafði ég sett á of langt þvottaprógram (með forþvotti) og þeir hurfu næstum því!

En ég vil sem sagt mæla með þessu, ef eða þegar sjónvarpssokkarnir ykkar eru orðnir of stórir, víðir eða ólögulegir eftir nokkra notkun þá má endilega skella þeim í þvottavélina, á stutt bómullarprógramm á 30 gráður. Ég klæddi mig í sokkana þegar þeir komu rakir úr vélinni, svona til að teygja þá eilítið til og sjá til þess að þeir pössuðu mér nú ennþá. Ég er með nokkuð stóran fót og nú passa þeir frábærlega, eru þéttir og hlýir, algjör draumur :)

Erla

Ponsufléttuhúfa úr léttlopa

2010-01-03T16:07:00.000Z

Hér kemur skemmtileg útgáfa af húfunni "Rósa rauða" í Prjónaperlubókinni, sem Marsíbil Lillý frá Keflavík hefur breytt og bætt.

Í bókinni er húfan í barnastærð og prjónuð í Drops alpacka, en Marsíbil Lillý prjónaði hana í fullorðinsstærð og úr léttlopa, og setti þessar fallegu keramiktölur frá Sólheimum á hana.
Kemur mjög skemmtilega út!!

Stroffið er prjónað á prjóna 2,5, og sjálf húfan á prjóna 3,5. Lillý fitjaði upp 92 lykkjur með léttlopa, en fylgdi annars uppskriftinni og úrtökum á kolli einsog þær eru í bókinni. Í húfuna fer rúmlega 1 dokka af léttlopa.

Munstrið í húfunni er í raun ekki fléttumunstur en lítur samt soldið út einsog lítið fléttumunstur, við köllum það ponsufléttur.... :-) Það er mjög einfalt, bara 3 umferðir sem eru endurteknar út húfuna, svona:

1. [Prjónið 3 brugðnar, 1 slétta, sláið bandinu uppá prjóninn, prjónið 1 slétta], endurtakið út umferðina.
2. Prjónið 3 brugðnar og 3 sléttar, út umferðina.
3. [Prjónið 3 brugðnar, 1 slétt lykkja er færð yfir á hægri prjón, prjónið 2 sléttar lykkjur, eina í einu, steypið óprjónuðu lykkjunni yfir 2 nýprjónuðu sléttu lykkjurnar], endurtakið út umferðina.

Sendið okkur endilega myndir af afrakstrinum ykkar úr Prjónaperlunum, það er svo gaman að sjá! Svo eru Prjónaperlurnar með klúbb á Facebook þar sem prjónarar geta sjálfir hlaðið upp myndir af prjóninu sínu.

Marsíbil Lillý herself....
Með fína ponsufléttuhúfu sem fór í jólapakka frá henni.

:-)

Í lok árs.....

2009-12-31T14:29:00.000Z

Jæja, þá er þetta prjónaár liðið.
Mikið rosalega er þetta búið að vera skemmtilegt ár.... á alla kanta - og þá sérstaklega prjónakanta.... :-) Það var svo gaman að vinna í prjónabókinni - og svo frábært auðvitað þegar hún kom út! Salan hefur gengið vonum framar, bókin rennur út einsog heitar lummur.... :-) Hún hefur nú selst í fleiri eintökum á þessum mánuði síðan hún kom út heldur en fyrsta bók Halldóru (Prjóniprjón) allt árið !

Bókin hefur fengið skemmtilega umfjöllun í ýmsum fjölmiðlum, það hefur lent meira á Erlu því Halldóra er jú úti í Stokkhólmi, þannig að Prjónaperlan Erla ætti að vera orðin flestum kunn hér á landi. Í byrjun nóvember var viðtal við Erlu á baksíðu Morgunblaðins um bókina, það kom svakalega vel út, skemmtileg umfjöllum um prjónagróskuna og flott mynd :) Baksíða Moggans - geri aðrir betur ha?! ;) Hér má sjá pdf af Moggaviðtalinu. Fréttablaðið var með prjónaumfjöllun og viðtal í sömu viku og bókin kom út (sjá pdf af viðtalinu hér), ásamt því sem Erla kom í viðtali í Morgunútvarpi Bylgjunnar þá vikuna. Þar lofaði Heimir Karlsson henni að læra að fitja upp mjög fljótlega...! Í desemberblaði Hús & híbýli var innlit heim til Erlu og fjölskyldu og mjög skemmtilegt 6 síðna viðtal við Prjónaperluna Erlu þar sem hún ræðir um prjón og Prjónaperlur, hér er pdf af því. Í jólablaði Samfylkingarinnar í Hafnarfirði í desember var sömuleiðis viðtal við Erlu og grein um bókina, enda Erla Hafnfirðingur og þó nokkrir prjónarar í bókinni sömuleiðis frá Hafnarfirði.

Svo var Sunnlenska fréttablaðið með grein um bókina í miðjum desember (Sjá hér fyrir neðan) ásamt því sem Fjarðarpósturinn og Bændablaðið hafa fjallað um bókina.
Allt að gerast....:-)
Gaman að því.

Jæja elskurnar. Við viljum þakka frábærar viðtökur og nota tækifærið og óska ykkur öllum gleðilegs nýs prjónaárs. Veriði áfram dugleg að grípa í prjónana, það er svo notalegt.
Njótum prjónalífsins.... :-)

Ykkar,
Halldóra og Erla

Litli Erlu-Prjónaperluson er fæddur!

2009-12-27T16:45:00.000Z

Vera stóra systir með brósa

Fyrst fæddist bókin okkar og svo kom barnið, alveg eins og eftir planinu! Sonur Erlu Prjónaperlu fæddist 13. desember sl. og kom á hárréttum tíma. Bókin var komin út, búið að dreifa henni og þá ákvað þessi elska að láta sjá sig :) Fæðingin líkt og bókaútgáfan gekk mjög vel og hann er svo vær og yndislegur. Hér má sjá hann á leið heim af fæðingardeildinni í EINU flíkinni sem ég hef prjónað á hann hingað til... ég var jú upptekin við vinnu í bókinni svo prjónaskapurinn fékk að sitja eilítið á hakanum... en nú er ég nú búin að fitja upp á lopapeysu á guttan og stefni í að prjóna mína fyrstu sokka með hæl - auðvitað upp úr Prjónaperlum. Þetta er allt að koma! Það er svo vonandi bara að hann gefi mér tvær hendur lausar til að prjóna á sig... ;)

Prjónaperlan Vilborg

2009-12-22T23:07:00.000Z

Hún Vilborg María er súperdúperPrjónaperla. Síprjónandi - ásamt því að vera með fullt hús af börnum og búskap með rollur og hross (og karl) - og vinnu sem leikskólastjóri (!). Manni dettur helst í hug að loftið þarna í sveitinni á Skarði (í Hreppum á Suðurlandi) þar sem hún býr hljóti að vera eitthvað extra orkuríkt, eða sólarhringarnir eitthvað extra langir, miðað við hversu miklu hún kemur í verk. Reyndar segir Vilborgu skýringuna á því vera þá að hún notar öll tækifæri sem gefast til að prjóna. Og er orðin mjög fær í að hræra í pottum, skipta á bleyjum, gefa brjóst og prjóna á sama tíma!! Svo er hún aldrei farþegi í bíl nema prjónandi - annað er prjónatímasóun á háu stigi.... :-)

Hún er sú prjónaperla sem á flest stykki í bókinni (fyrir utan okkur sjálfar, höfundana). Við bara gátum ekki gert upp á milli þeirra, okkur fannst það allt svo flott og langaði svo til að hafa allt með!

Hún er til dæmis höfundur litlu lopapeysunnar "Bokki", sem er úr einföldum plötulopa, og er því svo létt og þjál - en heit. Og svo yndislega einföld og skemmtileg. Munstrið í henni er að hluta til prjónað brugðið sem gefur mjög sérstakan stíl á flíkina.

Svo á hún líka kjólapeysuna "Hrafnaklukka", sem bæði má hafa sem peysu, eða ef hún er höfð síð, sem kjól. Hún er úr einföldum plötulopa og einbandi saman, frekar víð peysa með vítt hálsmál. Í munsturbekknum eru svo fallegir fjólubláir litir saman - einsog í blóminu hrafnaklukka. Munsturbekkurinn er prjónaður með plötulopa og einbandi saman eða tvöföldu einbandi - kemur mjög skemmtilega út.

Hér viljum við nota tækifærið og koma með ábendingu í sambandi við stroffið í Hrafnaklukku. Í henni er mjög flott stroff sem er prjónað svona: 1 slétt lykkja og 2 lykkjur perluprjón. Sem þýðir að lykkjufjöldinn sem fitjaður er upp þarf að ganga upp í töluna 3. Lykkjufjöldinn sem gefinn er upp hjá okkur í bókinni gerir það ekki....! Í stað þess að standa "Fitjið upp 119 (131) 143 lykkjur" ætti það því að vera: "Fitjið upp 120 (132) 144 lykkjur". Og sleppa þá að auka út um 1 lykkju þegar stroffi lýkur. Sömuleiðis í ermunum, þar á að standa: "Fitjið upp 42 (51) 60 lykkjur og prjónið stroff einsog í bolnum í 15 umferðir. Eftir stroffið er aukið út um 2 (1) 0 lykkjur: 44 (52) 60 lykkjur."

"Grámhildur góða" er ótrúlega falleg útprjónuð og hneppt peysa úr léttlopa. Hana þarf helst að skoða í eigin persónu til að munstrið og "upplifunin" af flíkinni skili sér að fullu.... :-) Útprjónið á berustykkinu er eitthvað svo látlaust en samt "elegant", og gerir flíkina svo sérstaka.

Vilborg á líka uppskriftina að litlu sokkunum "Sóley í túni" í bókinni. Þeir eru prjónaðir út grænum léttlopa og einbandi, með háu stroffi, heitir og voða góðir fyrir litla fætur. Svo er saumuð ein lítil sóley í þá - sem lífgar upp á allt í kring - alveg einsog þegar maður rekst á litla sóley í túni.
:-).

Svo er Vilborg með prjónablogg líka (!) sem hún laumar nokkrum línum og myndum á af og til þegar ró er komin í kotið seint á kvöldin, það er hér, kíkiði endilega á og skiljið eftir kveðju: www.lopinn.blogspot.com.

Jólakúl 2009

2009-12-07T15:52:00.000Z

Hún Vilborg, ein af prjónaperlunum okkar er með svo skemmtilegt verkefni í gangi. Hún hvetur til þess að við prjónum jólakúlur ! Af öllum stærðum og gerðum. Á blogginu hennar er grunnuppskrift að jólakúlu, prófiði endilega sjálf! Og sendið svo myndir til Vilborgar.

Þetta er sérdeilis upplagt fyrir prjónara til að koma sér í jólastemmningu !
Eller hur...

Á facebook er líka Jólakúl hópur - skráið ykkur endilega með :-)

:-)

Perlurnar okkar...

2009-12-04T13:27:00.000Z

Prjónaperlurnar okkar, sem eru með framlög í bókinni eru svo yndislegar.... allar sem ein. Okkur finnst við svo heppnar að hafa krækt í þær til að vera með í bókinni.

Þær eru svo sérstakar hver á sinn hátt – bæði í háttum og prjóni. Eru á öllum aldri, og alls staðar að frá landinu. Mjög gaman að sjá hvað þær nálgast prjónið á mismunandi hátt, hvað prjónasmekkurinn er mismunandi, og hvað það eru ólík verkefni sem helst verða fyrir valinu hjá hverri og einni. En allar eiga perlurnar það sameiginlegt að vera prjónarar af lífi og sál. Sumar þeirra hafa prjónað í yfir 70 ár (!) en aðrar bara í nokkra mánuði. Við ætlum að kynna nokkrar prjónaperlur hér á blogginu, en hér kemur fyrst upptalning á þeim öllum og stykkjunum þeirra, í stafrófsröð.

Prjónaperlurnar fínu:

Elísabet Matthíasdóttir, 62ja ára frá Siglufirði: Heklaðir ungbarnaskór, í bómullargarni.
Emelía Kristbjörnsdóttir, 83ja ára frá Skeiðum, Suðurlandi: Vettlingar prjónaðir langsum að sjónvarpssokkahætti, úr plötulopa.
Eva Rós Ólafsdóttir, 25 ára Hafnfirðingur: Apapeysa á litla kroppa, prjónuð ofan frá, í léttlopa.
Guðrún Axelsdóttir, 55 ára Hafnfirðingur: Síð kaðlapeysa úr plötulopa, Dúlluteppi Veru (heklað barnateppi), úr léttlopa, Hekla (hneppt barnapeysa ),úr einföldum plötulopa.
Helga Linnet, 35 ára frá Hafnarfirði: Fingravettlingar og húfa í stíl, léttlopi.
Hrönn Konráðsdóttir, 29 ára Reykvíkingur: Galdravettlingar, úr léttlopa.
Ilmur Dögg Gísladóttir, 32ja ára frá Reykjavík: Sjalið sumarskakki úr einbandi og Einföld peysa í öllum stærðum - með laskaermum, í hvaða garni sem er.
Hjónin Jóhann Jóhannsson og Guðný E. Kristjánsdóttir, sextug unglömb frá Stöðvarfirði: Eyrnaband að austan, úr plötulopa.
Jóhanna Hjaltadóttir, 90 ára Reykvíkingur: Prinsessutátiljur úr plötulopa.
Ingibjörg Ólafsdóttir, 51 árs, Reykjavík: Leikskólavettlingar úr sokkagarni og einbandi.
Kristrún Eiríksdóttir, 60 ára, Egilsstöðum: Rósastrengsvettlingar úr einbandi.
Margrét Gauja Magnúsdóttir, 33ja ára Hafnfirðingur: Ástarhúfan yndislega, úr léttlopa eða Dale freestyle.
Marín Þórsdóttir, 32ja ára Mosfellingur: Prjónaður kerrupoki, úr léttlopa, prinsessuspöng úr glimmergarni, heklaður froskur, úr bómullargarni.
Pom Ahnborg, 32ja ára, Stokkhólmi: Lambið krúttlega, úr krullugarni og hvítu ullarbandi, t.d. Kambgarn.
Ragnheiður Eiríksdóttir, 38 ára, frá Reykjavík: Peysan Lóa úr Nammigarninu eða einbandi.
Rán Ingvarsdóttir, 31 árs, Hafnarfirði: Prjónakrílin, úr hverju sem er.
Vilborg María Ástráðsdóttir, 34ra ára frá Hreppum á Suðurlandi: Bokki (lítil peysa úr einföldum plötulopa), Sóley í túni (litlir sokkar úr léttlopa), Hrafnaklukka (síð peysa eða kjólapeysa úr einföldum plötulopa og einbandi saman), Grámhildur (Útprjónuð hneppt peysa í fullorðinsstærð úr léttlopa).
Þorgerður Pálsdóttir, 29 ára, Reykjavík: Kaðlahúfa úr léttlopa.

Og svo eru það við sjálfar, og af því við erum frekastar þá erum við með 10 uppskriftir hver!.... :-)
Erla Sigurlaug Sigurðardóttir, 33ja ára Hafnfirðingur: Trefill í gegn,Garðaprjónssmekkur, hekluð Frjálsmen (hálsmen), Hekluð skotthúfa, Girnilega stroffhúfan, Sjónvarpssokkar, Speisaðir vettlingar, Klukkuprjónsslá, Klukkuprjónskragi, og Hekluð alpahúfa.
Halldóra Skarphéðinsdóttir, 41 árs, Stokkhólmi: Prjónuð skotthúfa, Venjulegir lopavettlingar, Pilsið Ljúfa, Peysan Emil, Hekluprjón vettlingarnir Fjólublár draumur, Eyrnahlífahúfa, Sjalið Möbíus, Barnapeysa prjónuð á hlið, Húfa með lausu blómi og Ponsufléttuhúfan Rósa.

Við erum í 8. himni...!

2009-12-01T00:02:00.000Z

Já, sjöundi himinn nær bara ekki yfir þetta!

Útgáfugleði Prjónaperla var haldin um síðastliðna helgi í Iðu og hún gekk vonum framar. Við erum í skýjunum yfir viðtökunum. Bjuggumst alls ekki við svona svakalega frábærum viðtökum! Það komu svo margir að við áttum fullt í fangi með að árita og spjalla, enda prjónarar og prjónabókaáhugafólk með eindæmum áhugavert og skemmtilegt fólk! Piparkökurnar kláruðust og bókin líka... En hún er aftur til núna - og á tilboðsverði eitthvað áfram - enda metsölubók vikunnar í Iðu :)

Prjónaperlur fást nú ... tja, nánast út um allt! Í helstu bókaverslunum og hannyrðabúðum, föndurbúðum, auk Hagkaupa, Krónunnar og á pósthúsum hér og þar um landið.

Meira prjón, meiri gleði...
Erla og Halldóra

Prjónaperlur komnar í verslanir!

2009-11-24T10:49:00.000Z

Þá er fína flotta prjónabókin okkar komin út! Það var unun að handfjatla fyrstu eintökin...mmmm....
Hún er nú komin í nokkrar verslanir á Höfuðborgarsvæðinu! Við dreifðum henni í gær í Hagkaup og Eymundsson á Stór-Reykjavíkursvæðinu og svo höldum við áfram að dreifa henni í lok vikunnar þegar restin kemur úr prentun. Þá verður hún fáanleg í hannyrðaverslunum og í ýmsum verslunum úti á landi. Eins er hægt að nálgast hana hér hjá okkur.

Prjónum meira og meira... :)
Erla og Halldóra

Útgáfugleði Prjónaperla

2009-11-20T17:39:00.000Z

Elskulegu prjónaperlur, vinir og aðdáendur nær og fjær,

Þið eruð öll hjartanlega velkomin að koma og fagna með okkur á útgáfugleði Prjónaperla sem verður haldin laugardaginn 28. nóvember n.k. kl. 11 - 13 í Iðu, Lækjargötu 2a, Reykjavík.

Fyrir utan almenna prjónagleði og fögnuð verður hægt að skoða eitthvað af prjónastykkjunum úr bókinni á staðnum, auk þess sem bókin verður til sölu á sérstöku tilboðsverði.

Við verðum auðvitað báðar á svæðinu,
hlökkum til að sjá ykkur!
Halldóra og Erla.

Myndir úr bókinni

2009-11-16T00:13:00.001Z

Hér má sjá nokkrar myndir af stykkjunum í Prjónaperlum. Einsog þið sjáið eru þau ótrúlega fjölbreytt - hvert öðru skemmtilegra.

Hér má sjá fleiri myndir á Flickr, og einnig lesa smá texta um stykkin.

1. Bokki - Vilborg, 2. Leikskólavettlingar - Ingibjörg, 3. Rauðir rósastrengsvettlingar - Kristrún, 4. Prinsessutátiljur - Jóhanna, 5. Emil - Halldóra, 6. Galdravettlingar - Hrönn, 7. Kúl klukkuprjónskragi - Erla, 8. Fúsi ðe frog - Marín, 9. Sætu sokkarnir Sóley í túni - Vilborg, 10. Eyrnaband að austan - Jóhann & Guðný, 11. Kaðlapeysa - Guðrún, 12. Sjónvarpsvettlingar #3 - Emelía, 13. Ungbarnaskór - Elsa, 14. Peysa á hlið, bakhlið - Halldóra, 15. Alpahúfa - Erla, 16. Ástarhúfa - Magga Gauja.

Þetta er allt að koma.....

2009-11-13T10:03:00.001Z

Jæja, þá malla Prjónaperlur í prentsmiðjunni...
Við erum auðvitað mjög spenntar að sjá útkomuna. Svo mörg spennandi verkefni og skemmtilegar frásagnir, og flottar myndir sem við erum búnar að reyna að gera góð skil.... Oh, hvað það verður gaman að sjá þetta í eigin persónu !!

Bókin verður til sölu í verslunum um allt land, einnig verður hægt að panta hana með því að senda okkur línu á prjonaperlur@gmail.com og fá hana senda heim. Hún kemur til með að kosta um 3.600kr.

Við skellum fljótlega myndum úr bókinni hingað inn á bloggið svo þið getið fengið smjörþef af herlegheitunum og farið að láta ykkur hlakka til.

Útgáfugleðin verður svo líklegast haldin síðasta laugardaginn í nóvember - við látum ykkur að sjálfsögðu vita hvar og hvenær þegar nær dregur :-) !

.

Prjónaperlur í Mogganum í gær 3. nóvember

2009-11-04T09:56:00.001Z

Við vorum á baksíðu Moggans í gær, þessi mynd og grein :)

PRJÓNAÆÐI meðal Íslendinga hefur sjaldan verið meira en um þessar mundir. Frænkurnar Erla Sigurlaug Sigurðardóttir og Halldóra Skarphéðinsdóttir fóru ekki varhluta af því og hófu í sumar söfnun uppskrifta hjá prjónurum úr grasrótinni. Afraksturinn má finna í bók þeirra Prjónaperlur - prjónað frá grasrótinni sem kemur út í lok mánaðar.

Í kjölfar þess að Erla missti vinnu sína sem kennari í sumar sótti hún Halldóru frænku sína heim til Stokkhólms í húsmæðraorlof, en það gerir hún reglulega. Halldóra sem er mikil prjónakona og annar höfunda prjónabókarinnar Prjóniprjón tók Erlu sem áður í handavinnukennslu. Vaknaði þá hugmyndin að grasrótaprjónabókinni.

„Mannfræðileg prjónabók“

"Þar sem svo mikil gróska er í prjóni á Íslandi vorum við forvitnar að vita hvað fólk væri að prjóna. Við höfðum samband við prjónara sem við vissum að færu ekki eftir hefðbundnum uppskriftum og prjónuðu og hekluðu frekar eftir eigin höfði" segir Erla og bætir við að söfnunin hafi gengið framar vonum. Í bókinni má finna um fimmtíu prjónauppskriftir eftir átján prjónara, hinar eiginlegu prjónaperlur úr grasrótinni, auk Erlu og Halldóru. Perlurnar eru hvaðanæva af landinu. „Við köllum bókina stundum „mannfræðilega prjónabók“ þar sem auk uppskriftanna fylgir léttur og húmorískur texti um hvern prjónara.“

Uppskriftirnar voru sérstaklega valdar af Erlu og Halldóru, sem létu ekki fjarlægðina stöðva samstarfið. Ekki er nema rúmt ár síðan Erla hóf að fikta af alvöru við prjónið. Halldóru má hins vegar flokka sem þungavigtaprjónara. Farin var sú leið að velja uppskriftir sem allir gætu prjónað. "Uppskriftirnar eru mjög fjölbreyttar og henta bæði byrjendum sem þaulvönum og er hver uppskrift einstök prjónaperla. Við lögðum upp með að hafa uppskriftirnar á mannamáli og það fór engin uppskrift í bókina sem ég skildi ekki sem byrjandi“.

Erla sem á von á sínu öðru barni eftir fáeinar vikur segir fjölda af uppskriftum hafa safnast til viðbótar. Hún á því allt eins von á að fleiri prjónaperlur líti dagsins ljós.

Hnotskurn
»Erla er mannfræðingur og Halldóra doktor í líffræði.
»Þær söfnuðu sjálfar uppskriftum, skrifuðu textann, tóku ljósmyndir og
settu bókina upp.

PRJÓNAPERLUR!

2009-10-28T11:08:00.000Z

Já, það er ný prjónabók á leiðinni!!!..... Hrikalega skemmtilegt ....:-) Hún kemur út í nóvember, og við frænkurnar (og prjónabókahöfundarnir) erum á fullu að klára allt sem klára þarf. Síðustu daga erum við búnar að liggja yfir og lúslesa og lagfæra og breyta og bæta prjónauppskriftir..... okkur dreymir nú sléttar og brugðnar á nóttunni (ljúfir draumar)! og hugsum um útaukningar, lykkjufjölda og laskaermar þegar við stoppum á rauðu ljósi, og biðjum um ermina í staðinn fyrir smjörið við kvöldvarðarborðið....hahaha J.

Bókin heitir "PRJÓNAPERLUR - prjónað frá grasrótinni", sem er mjög lýsandi fyri bókina. Það vísar annars vegar til uppskriftanna í bókinni, og hins vegar til prjónafólksins sem deilir hér með sér uppskriftunum sínum. Í bókinni gefa 20 prjónaperlur (með okkur Erlu) hvaðanæva að af landinu, uppskriftirnar sínar. Alls konar venjulegt fólk, eins og þú og við, mjög ólíkir einstaklingar – en sem eiga það öll sameiginlegt að hafa verið bitnir af blessaðri prjónabakteríunni. Uppskriftirnar verða í kringum 45, þær eru mjög fjölbreyttar og kennir þar ýmissa grasa. Sumir gefa uppáhaldsuppskriftina sína, eða eitthvað sem þeir hafa þróað á löngum tíma, eitthvað sem þeir prjóna oft, sumir gefa uppskrift sem hefur sérstaka þýðingu fyrir þá, og sumt er hannað alveg sérstaklega fyrir þessa bók. Til dæmis. Og við erum svo ánægðar með allar uppskriftirnar! Finnst þær allar svo flottar og skemmtilegar, og langar helst að fitja upp á öllu saman strax í dag !!! Enda eru jú allar uppskriftirnar vandlega valdar af okkur - eins og fínustu perlur :). Svo er svo skemmtilegur texti um hverja prjónaperlu, svona léttur og húmorískur texti um hvern og einn. Og svo gefa allir upp prjónamottó eða einkunnarorð, þau eru mörg hver alveg frábær.....

Við erum svo spenntar! – getum ekki beðið eftir að bókin verði tilbúin...... En já, þá er að bretta upp ermarnar fyrir lokaátakið. Back to work!

Erla og Halldóra

Prjónaperlurnar við

2009-10-28T10:29:00.000Z

Þetta erum við frænkurnar og útgefendur bókarinnar.

Og já - við erum alltaf svona sætar og glaðar!!!

Erla & Halldóra

Erla er litla frænka hennar Halldóru. En samt er hún stærri. Halldóra er föðursystir Erlu. Það eru átta ár á milli okkar frænkanna en aldursbilið hefur einhvern veginn horfið í áranna rás...! Halldóra passaði Erlu þegar hún var lítil og svo passaði Erla frumburð Halldóru þegar Erla var unglingur og Halldóra á fullu í háskólanámi. Svona höfum við alltaf hjálpast að. Samvinnan í Prjónaperlum gengur því undurvel, þrátt fyrir miklar fjarlægðir, en Erla býr í Hafnarfirði og Halldóra í Svíþjóð! Þangað flutti Halldóra fyrir 10 árum þegar hún ákvað að verða gáfaðri og fara í doktorsnám í líffræði. Erla hefur verið með stöðugan áróður á Halldóru síðastliðin ár um að koma HEIM. Heim til hennar - en Halldóra er víst orðin of mikilvæg og upptekin við rannsóknir í sænska Háskólanum sínum og kann orðið aðeins of vel við sænskar kjötbollur og kanilbulla.

Erla passar samt upp á að Halldóra haldi áfram að vera Íslendingur með öllum brögðum og ráðum eins og að senda henni reglulega lakkrís, kleinur, hangikjöt og grænar baunir. Til að minnka bilið á milli okkar eru heimsóknir reglulega á dagskrá og snúast þær undanfarin ár að miklu leyti um handavinnu. Erla mætir reglulega til Stokkhólms í húsmæðraorlof og notar tímann í Handavinnuskóla Halldóru eins og hún kallar það. Halldóra er nefninlega prjóna- og heklsjéníið hennar Erlu, sem hefur lært ansi margt af henni. Sérstaklega þolinmæði og nákvæmni, enda er Halldóra róleg og nákvæm vísindakona. Erlu er hins vegar vel lýst sem glaðværu og nokkuð hvatvísu fljúgandi fiðrildi sem lifir í núinu. Hún þrífst illa í ládeyðu og vill framkvæma frekar en bíða. Halldóra hefur tekið sér það til fyrirmyndar að einhverju leyti og er nú að æfa sig í að "kýla á hlutina" í stað þess að melta þá leeeengi (eins og einhver Svíi!).

Við erum líka með nokkuð ólíkan fatasmekk. Halldóra reynir að taka sér litagleði í fatastíl Erlu til fyrirmyndar og Erla reynir að kaupa stundum svörtu skóna í stað þeirra appelsínugulu - að hætti Halldóru. Hins vegar má furðu sæta hversu samtaka við erum þegar kemur að prjóneríi. Það var alls ekkert erfitt að velja prjónavörur í bókina, þar vorum við á sömu línu.

Saman erum við bara svo flott blanda.
Og "Prjónaperlur" eru afrakstur ólíkra frænkna sem njóta styrkleika hvorar annarrar :)

Prjónaperlur - prjónað frá grasrótinni

2009-10-20T15:59:00.000+01:00

Prjónaperlur er prjónabókin í ár - kemur út í nóvember...!

Kveðja,
Erla og Halldóra